Loga teavstta davvisámegillii
Looǥǥ mainnâz nuõrttsääʹmǩiõʹlle
Lue teksti suomeksi
Täärhist, ete kyeskih-uv Kela hiätunubástusah tunjin
- Páárnášperruuh. Peerârijjâuđâsmittem puátá vuáimán porgemáánust. Vaanhimijpeiviruuđâi pištem, äigimuddo já juáhásem vaanhimij kooskâ muttojeh. Uđđâ peerâriijah kyeskih perruid, main párnáá rekinistum šoddâmäigi lii 4.9.2022 tâi ton maŋa. Párnáitipšo torjuid puátá aledem ive aalgâst. Oovtâ, vuálá 3-ihásii párnáást mäksimnáál tipšoruuđâ uđđâ meeri lii 350,27 e/mp. Luuvâ lase páárnášperrui hiäđuin.
Sämikielâlijd vuosâkiirjijd puáhtá tiiláđ ive 2022 aalgâ rääjist. Sij, kiäh láá finnim enijpakkeet iivijn 2020 já 2021, pyehtih tiiláđ sämikielâlii vuosâkirje spiekâstâhlávt meid maajeeldkietân. Luuvâ lase sämikielâlii vuosâkirjeest. - Uáppeeh. Uápputorjuu puáturääjih pajaneh ive 2022 äigin niäljádâssáin. Uáppee puáhtá tiänáđ 15 630 eurod, jis sun paajeed uápputorjuu 9 mánuppaajeest. Uáppuruuđáid puátá 2,1 % aledem 1.8.2022. Luuvâ lase uáppei hiäđuin.
- Pargottemeh. Vyesimáánu aalgâ rääjist puátá vuáimán uđđâ paargonuuccâmmalli. Pargo-occee já PI-palvâlusâi tâi kieldâ äššitobdee teivih tállân pargottesvuođâ aalgâst já rähtih pargofinnimvuávám. Vuáđunjuolgâdus lii, ete pargo-occee kalga uuccâđ nelji pargosaje mánuppaajeest. Kaareens kukkodâh uánnán. Vuáđupeiviruuđâ já pargomarkkântorjuu meeri pajeduvvoo 72 snt/pv. Uđđâ meeri lii 35,40 e/pv. Luuvâ lase pargottemij hiäđuin.
- Leeskah. Ive 2022 rääjist meid ávuskyeimist lii vuoigâdvuotâ leskâiäláttâhân, jis sun lii aassâm jáámmám ávuskuoimijn oovtmanolávt ucemustáá vittâ ive ja sunnust lii ohtsâš, vyeliahasâš páárnáš. Leskâiäláttâh muttoo meriáigásâžžân nuorâ leeskâin. Leskâiäláttuvâi uđâsmittem kuáská tiilijd, main pelikyeimi jáámá ive 2022 tâi ton maŋa. Luuvâ lase peerâiäláttuvâin.
- Iäláttâhliih. Aalmugiäláttâhân já táhádâsiäláttâhân puátá 2,1 % indeksaledem. Oles aalmugiäláttâh ohtuunis ässei lii 1.1.2022 rääjist 679,50 e/mp já táhádâsiäláttâh 855,48 e/mp. Kela täärhist iäláttuvâi euromere sierâ ucâmušttáá. Luuvâ lase iäláttâhlij hiäđuin.
- Puoccâmân lohtâseijee torjuuh. Talhâskoloi ihejiešvástádâs (nk. talhâskáttu) stuáru 12,38 eurod. Ive 2022 tot lii 592,16 eurod. Puoccâmpeiviruuđâ kuhháá finnim vajoidittemtáárbu selvâttem pehtiliteh. Kela seelvât vajoidittemtáárbu ko puoccâmpeiviruttâ lii maksum 60, 150 já 230 peivid. Puoccâmpeiviruuđâ sehe vajoidittem- já sierânâstipšoruuđâ ucemusmereh pajeduvvojeh 62 snt/pv. Luuvâ lase puoccâmân lohtâseijee torjuin.
- Tiervâsvuođâhuolâttâs palvâlussáid tohhum määđhih. Kela-taaksi tiilámnumereh muttojeh. 1.1.2022 rääjist jyehi eennâmkoddeest láá kyehti palvâlempyevtitteijee, main Kela sajanmäksim taksimääđhih tiilájuvvojeh. Äššigâs puáhtá jieš valjiđ, ete kuábbáást sun tiiláá määđhis. Sämikuávlust ässee sämikielâlij äššigâsâi vuoigâdvuotâ jieijâskielâlii Kela-taaksi kiävtun juátkoo siämmáálágánin. Návt tun tiilááh sämikielâlii Kela-taaksi.
Kela juátká koronapuákuttâs väldimist šaddee mätkikoloi sajanmäksim 30.6.2022 räi. Meid koronaiskosân tohhum määđhist finnee sajanmáávsu. Luuvâ lase mätkisajanmáávsuin.
