Halijdah-uv tun váldásmittiđ nube ulmuu hoittáđ jieijâd aašijd?

Loga teavstta davvisámegillii
Looǥǥ mainnâz nuõrttsääʹmǩiõʹlle
Lue teksti suomeksi

Taam váldásmittem uáivild já návt tun váldásmitáh nube ulmuu hoittáđ jieijâd aašijd  

1. Kela-aašijd ij lah pággu hoittáđ jieš, peic táárbu mield kiinii eres puáhtá hoittáđ taid tuu peeleest. Tađe várás kalga toohâđ väldikirje (VAL3).   

Väldikirje – Hiätuaašij hoittám Kelast (VAL 3smn)
Teevdi väldikirje sajan 1 jieijâd tiäđuid. 

2. Tun puávtáh jieš valjiđ, ete kiäs tun adelah väldikirje. Sun kalga kuittâg leđe ucemustáá 18-ihásâš. Olmooš, kote ášástâl nube peeleest väldikirjijn, kočoduvvoo äššiolmožin. 

3. Tun meridah jieš, ete maid aašijd äššiolmooš puáhtá hoittáđ. Tun puávtáh adeliđ sunjin love hoittáđ puoh tuu aašijd teikâ tuš oovtâ ääši. Sun puáhtá ovdâmerkkân uuccâđ hiäđu tâi almottiđ nubástusâin. Sun puáhtá meid finniđ pargos hoittám várás tuu syeligâsâst toollâmnáál tiäđuid, tego tiäđuid tuu hiäđuin, ekonomâlii tiileest tâi tiervâsvuođâtiileest. 
Jis tun halijdah, ete äššiolmooš hoittáá tuu peeleest tuš oovtâ hiätun lohtâseijee aašijd, te čääli väldikiirján hiäđu noomâ, ovdâmerkkân aassâmtoorjâ. Tilinummeer nubásmittem várás kalga ain toohâđ sierâ väldikirje.

4. Tun meridah jieš meid tom, ete mon kuhháá väldikirje lii vyeimist. Tot lii vyeimist jo-uv tuáistáážân tâi tiätu peivimere räi. Tun puávtáh kuás peri meid mutteđ väldikirje vyeimistorroom tâi keessiđ maassâd tuu adelem váldásmittem almootmáin Kelan. Tun jieh taarbâš muštâliđ suujâ maassâdkesimân.  

5. Tuu vuáláčaalâ väldikirjeest visásmit tom, ete tun lah jieš adelâm váldásmittem.     

6. Väldikirje adeleijen tun puávtáh toimâttiđ väldikirje OmaKelast, poostâ peht tâi palvâlemsajan. Äššiolmooš puáhtá toimâttiđ väldikirje poostâ peht tâi palvâlemsajan.