Loga teavstta davvisámegillii
Looǥǥ teeʹkst nuõrttsääʹmǩiõʹlle
Lue teksti suomeksi
Neetist láá puigâ nálásiih fillimsiijđoh. Ko uhre čáálá jieijâs nettipaŋkkitubdâlduv fillimsiijđon, te rikoliih peesih uhre nettipaaŋkin já pyehtih suáládiđ ruuđâid tilist. Fillimsiijđoid sättih rähtiđ paaŋkij, OmaKanta (MuuKanta) tâi Kela noomâ vuálá.
Te oro neetist ain huolâlâš já čuávu vyelni orroo ravvuid, ko čáládâđah OmaKelan!
Ravvuuh torvolii ášástâlmân OmaKelast
- Jis tun kiävtáh tiättur ovdâmerkkân kirjeráájust tâi Kela palvâlemsaajeest já oovdeb kevttee lii kuáđám laađđâm ávus, te starttaa laađđâm uđđâsist.
- Čääli laađđâm čujottâsraddalâsân kela.fi. Ko puáđáh siijđon, te čujottâsraddalâsâst uáinoo luuhâ kove. Taat uáivild tom, ete tiäđuh vuolgâttuvvojeh torvolávt kela.fin ige taid pyevti suáládiđ. Ele čáládât OmaKelan njuolgist neeti uuccâmohjelmpuátusijn.
- Vuorkkii kela.fi-sijđo jieijâd laađđâm kirjemerháid teikâ pivnoháid. Návt tun peesah puátteevuođâst siijđon kevtihánnáá uuccâmohjelmijd.
- Valjii kela.fi-siijđoin puálu Kirjaudu (Čáládât). Puálust liäkká Suomi.fi-palvelus čáládâttâmsiijđo, mast tun peesah valjiđ tubdâttâttâmvyevi, mon halijdah teikâ jieijâd paaŋki. Suomi.fi lii almoshaldâttuv ohtsâš tubdâttâttâmpalvâlus, já meid tobbeen tiäđuh vuolgâttuvvojeh torvolávt. Siijđo čujottâs uássin lohá tunnistautuminen.suomi.fi, já čujottâsraddalâsâst lii luuhâ kove.
- Jis tun tubdâttâđah OmaKelan paŋkkitubdâlduvâiguin, te palvâlemfällen puáhtá oinuđ Osuuspankki (OP), veikâ tuu kiävtust liččii-uv monnii eres paaŋki tubdâlduvah.
- Jis tun tubdâttâđah moobiilvisásmitmáin, te palvâlemfällen sáttá oinuđ Telia. Taat ij vaaigut tubdâttâtmân: kela.fist lii ain torvolâš čáládâttâđ OmaKelan.
- Čáládât OmaKelast olgos ain, ko jooskah tom kevttim. Siho meid laađđâm sijđohistorjá já koskâmušto sehe piejâ kiddâ puoh ávus laađđâmlaasâid. Návt tun visásmitáh, ete ulmuuh, kiäh kevttih maŋeláá siämmáá piergâs, iä pyevti uáiniđ tuu tiäđuid.
Ele kuássin vuolgât šleđgâpoostâ peht ärgiluándulijd tiäđuid, tego persovntubdâlduv teikâ paŋkkitubdâlduvâid. Kela ij kuássin koijâd taid šleđgâpostáin teikâ tekstâviestáin.
Huámmáš meid, ete OmaKela-palvâlusâst ij lah sierâ moobiilheiviittâs.
Ášástâl torvolávt meid OmaKantast (MuuKanta)! Luuvâ oonâid kanta.fist (suomâkielân).
Maid mun poorgâm, jis lam karttâm tiäđuiháputtâllâmirâttâs čuosâttâhhân?
Jis tun lah karttâm iäpádâs rävkkee siijđon teikâ finnim viestâ, mii táttu čáládâttâm, te tooimâ čuávvoo náál:
- Ele västid viestân teikâ čääli jieijâd tiäđuid vattum soojijd.
- Ele spokkâl viestâst orroo liiŋkâid.
- Jis tun epidah, ete tuu paŋkkitubdâlduvah láá karttâm puástukieđáid, te vääldi ohtâvuođâ jieijâd paaŋki äššigâspalvâlusân já toovâ ton maŋa rikosalmottâs poolisân.
- Jis iäpádâs rävkkee sijđo lii nabdam, ete tuáimá Kela noomáin, te almoot ääšist Kelan.
- Uáppáásm meid tietovuotoapu.fi (suomâkielân) -sijđoid!
