Luuvâ mainâs anarâškielân
Looǥǥ teeʹkst nuõrttsääʹmǩiõʹlle
Lue teksti suomeksi
Neahtas leat dájuhansiiddut, mat muittuhit albma siidduid. Go oaffar čállá iežas báŋkodovddaldaga dájuhansiidduide, rihkolaččat besset oaffara neahttabáŋkui ja sáhttet suoládit konttus ruđa. Dájuhansiidduid sáhttá ráhkadit báŋkkuid, OmaKanta (MuKanta) dahje Kela nama vuollái.
Muitte leat dasto neahtas álot fuolalaš ja čuovo rávvagiid, mat leat dás vuolde, go logget sisa OmaKelai!
Rávvagat dorvvolaš áššedikšumii OmaKelas
- Juos don geavahat dihtora ovdamearkan girjerádjosis dahje Kela bálvalanbáikkis ja ovddit geavaheaddji lea guođđán bláđejeaddji rabas, bija bláđejeaddji johtui ođđasit.
- Čále bláđejeaddji čujuhusráđđii kela.fi. Go boađát siidui, čujuhusráđas oidno lohka govva. Dát dárkkuha dan, ahte dieđut sáddejuvvojit dorvvolaččat kela.fi iige daid sáhte suoládit. Ale logge sisa OmaKelai njuolgga neahta ohcanprográmmabohtosiid bokte.
- Vurke kela.fi-siiddu bláđejeaddji bustávvamearkkaide dahje favorihtaide. Beasat dán siidui boahttevuođas njuolgga geavatkeahttá ohcanprográmmaid.
- Vállje kela.fi siiddus Kirjaudu (Logge sisa). Boalus rahpasa sisaloggensiidu, mii lea Suomi.fi-bálvalusas, ja gos beasat válljet du háliidan sisačálihanvuogi dahje iežat báŋkku. Suomi.fi lea almmolašhálddahusa oktasaš sisačálihanbálvalus, ja maiddái doppe dieđut sáddejuvvojit dorvvolaččat. Siiddu čujuhusa oassin lohká tunnistautuminen.suomi.fi, ja čujuhusráđas lea lohka govva.
- Juos sisačálihat iežat OmaKelai báŋkodovddaldagain, sáhttá bálvalusfállin oidnot Osuuspankki (OP), vaikke anus livččege man nu eará báŋkku dovddaldagat.
- Juos sisačálihat iežat mobiilanannehusain, bálvalusfállin sáhttá oidnot Telia. Dát ii váikkut sisačáliheapmái: kela:fis lea álot dorvvolaš logget sisa OmaKelai.
- Čálit iežat OmaKelas olggos álot, go heaittát dan geavaheami. Gurre maiddái bláđejeaddji siidohistorjjá ja gaskamuittu, sihke gidde buot rabas bláđenruvttuid. Ná sihkkarasttát, ahte olbmot, geat geavahit du maŋŋá seammá rusttega, eai beasa oaidnit du dieđuid.
Ale goassige sádde šleađgapoasttain suollemas dieđuid, nugo persovdnanummira dahje báŋkodovddaldagaid. Kela ii goassige jeara daid šleađgapoasttain dahje teakstasániin.
Fuopmáš maiddái, ahte OmaKela-bálvalusas ii leat sierra mobiilaheivehus.
Divššo áššiidat dorvvolaččat maiddái OmaKantas (MuKanta)! Loga neavvagiid kanta.fis (suomagillii).
