Kieliversiot 3 min

Nääiʹt Kela ouddõõzz mottje eeʹjj 2021

Eeʹjj aalǥâst viõʹǩǩe puäʹtte lääʹǩǩmuttâz, kook vaaikte Kela ouddõõzzid še. Looǥǥ täʹst, mõõn nalla mättʼtõõttji, reâuǥteʹmes oummi, kuʹǩesääiʹj puõccji, jeältõkniiʹǩǩi da päʹrnnpiârrji tuärjjõõzz mottje.

Teʹkstt da koovv Kela 8.1.2021
""

Tääʹrǩest, kueʹsǩǩe-a Kela ouddõsmuttâz tuu

  1. Õllškooulmättʼtõõttji ođđ tiõrvâsvuõtthåiddmähss. Õllškooulmättʼtõõtti mäʹhsse tiõrvâsvuõtthåiddmääus Kelaaʹje vuõssmõs vuâra ǩiđđlookkâmpââʹjest 2021. Tiõrvâsvuõtthåiddmääus mieʹrr lij 35,80 euʹrred lookkâmpââʹjest eeʹjjest 2021. Mättʼtõõttja jeät vuõlttuku laask, peʹce mättʼtõõtti âlgg mäʹhssed määus jiõčč altteeʹl Kela äʹššeemkääzzkõõzzâst. Looǥǥ lââʹzz tiõrvâsvuõtthåiddmääus pirr.
  2. Õllškooulmättʼtõõttji porrmõštuärjjõs pâjjan 0,36 euʹrred. Tuärjjõs lij 2,30 euʹrred porrmõõžž vuâstta. Mättʼtõõttji tuärjjõõzzid puätt muuttâs še korona diõtt. Ouddmiârkkân mättläinnpueʹrõʹsse leʹbe mättläinn ǩeäʹppõʹsse vuõiggõʹtti mieʹrrääiʹj vueiʹtet kuuʹǩǩeed 0,5 lookkâmiiʹjjin, jos valmštõõvvmõš čâhčča mâŋŋni koronaepidemia diõtt. Nuʹtt še škooulmäʹtǩǩtuärjjõõzzâst määin mottje kõskkpoddsânji. Looǥǥ lââʹzz mättʼtõõttji ouddõõzzi pirr.
  3. Reâuǥteʹmes oummu. Måtam reâuǥteʹmesvuõttstaaʹne tuejjuum koronačoʹrstõõǥǥin juätkkje 31.3.2021 räjja. Ouddmiârkkân reâuǥteʹmesvuõttouddõõzz sueʹjjvueʹss lij pââʹjuum 500 eeuʹr räjja da liikkeemvuõttvieʹǩǩtõõzz määin lie hiâlptum.
    Põõrǥâsneeʹǩǩ vuäiʹtte veâl vuäǯǯad pâʹzzlâšttam-mannu loopp räjja reâuggmarkkântuärjjõõzz, jos põõrǥâstoiʹmm lij mõõnnâm hueʹnab årra koronaepidemia diõtt. Vuâđđpeiʹvvtieʹǧǧ da reâuggmarkkântuärjjõõzz mieʹrid pââʹjeet 12 snt/pv. Ođđ mieʹrr lij 33,78 e/pv. Looǥǥ lââʹzz reâuǥteʹmes oummi ouddõõzzi pirr.
  4. Kuʹǩesääiʹj puõcci. Taalkâskoolai eeʹǩǩjiõččvasttõs (ns. taalkâslaakk) pâjjan 2,12 euʹrred. Eeʹjjest 2021 tõt lij 579,78 e/kaʹlndareeʹǩǩ. Puõʒʒâlmpeiʹvvtieʹǧǧ di säuʹrsmâʹttem- da spesiaalhåiddtieʹǧǧ ooʹccmõsmieʹrid pââʹjeet 11 snt/pv. Reâugglevvjummuž leʹbe nââʹjjerapnea puõccjid jäʹrjstet ođđnallšem säuʹrsmâttmõõžž. Nuʹtt še nuõrid, koin lij tuõttum Asperger, ADHD leʹbe ADD, lij taʹrjjeemnalla ođđ säuʹrsmâʹttemkääzzkõs. Looǥǥ lââʹzz puõʒʒâlmääiʹj da säuʹrsmâttmõõžž tuärjjõõzzi pirr.
  5. Jeältõkneeʹǩǩ. Meerjeältõʹǩǩe da staanjeältõʹǩǩe puätt 0,4 % indeʹksspââjõs. Tiudd narodjeältõk jiõččines jälsteeja lij 1.1.2021 ääʹljeeʹl 665,29 e/mp da staanjeältõk 837,59 e/mp. Kela tääʹrǩast jeältõõǥǥi euʹrrmeäʹr jeeʹrab ooccâmtaa. Looǥǥ lââʹzz jeältõkniiʹǩǩi ouddõõzzi pirr.
  6. Päärnažlââʹzz da tõid kuulli õhttuhuõlteeipââjõõzz seilla tââʹđstes. Jeäʹnnvuõtt-, eʹččvuõtt- da puärrsipeiʹvvtieʹǧǧ di spesiaaljeäʹnnvuõtt-tieʹǧǧ ooʹccmõsmieʹrr šorran siõmmna. Ođđ mieʹrr lij 29,05 e/pv. Looǥǥ lââʹzz päʹrnnpiârrji ouddõõzzi pirr.
  7. Ouddõs- da jeältõkteâđ puåđrekisteera. Eeʹjj 2021 aalǥâst vueʹljeeʹl Kela iʹlmmat puåđrekisteera teâđaid mahssum ouddõõzzin da jeältõõǥǥin. Puåđvuäǯǯai vuäitt tääʹrǩsted puåđrekisteeʹr liâdǥlaž äʹššeemkääzzkõõzzâst ääiʹjtässʼsaž teâđaid jiiʹjjes päʹlǩǩ-, jeältõk- da ouddõspuåttjin. Looǥǥ lââʹzz puåđrekisteeʹr pirr (lääʹddǩiõʹlle).
Aihesanatsaame