Kela falâškuát Laapi kieldâi ässeid uđđâlágán káiduspalvâlus. Palvâlusâst äššigâs finnee oovtâ puálu spokkâlmáin kove- já jienâohtâvuođâ Kela äššigâspalvâleijei veikâ jieijâs päikkisohvá alne čokkáádijn. Káiduspalvâlusâst puáhtá hoittáđ puoh Kela-aašijd, tego Kela palvâlemsoojijn-uv.
Káiduspalvâlusâst kevttum tekniik ana uásálisteid máhđulâžžân čááitu jyehim, te äššigâspalvâleijee puáhtá ovdâmerkkân išediđ äššigâs luámáttuv tevdimist. Palvâlusâst lii meid chat-jiešvuotâ. Palvâlus kevttim ij määvsi äššigâsân maiden.
Jis äššigâsâst ij lah máhđulâšvuotâ väldiđ ohtâvuođâ pääihist, te ohtâvuođâ finnee älkkeht meid Virtu-palvâlemsoojijn (suomâkielân). Virtu-palvâlemsaje lii kieldâässee šleđgâlii ášástâllâm saje, mast kieldâässee puáhtá kevttiđ kovepuhelinpalvâlusâid já eres Internet-palvâlusâid, sehe printtiđ, kopijistiđ já skannađ.
Kela fáálá káiduspalvâlus meid tavesämikielân já nuorttâlâškielân argâpeeivij tme 9–11.
5 fakta káiduspalvâlusâst
- Kela káiduspalvâlus lii uáivildum eromâšávt Laapi kieldâi ässeid. Káiduspalvâlmist puáhtá hoittáđ puoh Kela-aašijd. Káiduspalvâlusâst finnee meid digitorjuu jiešráđálii nettiášástâlmân.
- Kela káiduspalvâlus lii ávus argâpeeivij tme 9–15. Palvâlusân ij taarbâš čáládâttâđ teikâ väridiđ ääigi, ige tot määvsi äššigâsân maiden.
- Kela káiduspalvâlus ohtâvuođâväldim liŋkkâ lii virtu.fi-portaalist (suomâkielân).
- Ohtâvuotâ lekkâs automaatlávt Kela äššigâspalvâleijei, kote lii vuossâmužžân rijjâ. Varriidât toos, ete ohtâvuođâ väldim sáttá pišteđ mottoom tove. Palvâlus kevttimân tun tarbâšah
- tablet, fiättupuhelin tâi tiättur, mast lii kamera
- Chrome-, Firefox- tâi Safari-laađđâm
- tuárvi pyeri nettiohtâvuođâ
- peljipiiltoid, main lii mikrofon (teikâ mikrofon já škajânijd).
- Jis ohtâvuođâ väldim ij luhostuu pääihist, te Kela káiduspalvâlusân finnee ohtâvuođâ meid Virtu-palvâlemsoojijn (suomâkielân), moh láá pirrâ Laapi.
