Kela älgg taʹrjjeed Lappi kooʹddi aassjid ođđ ougglõskääzzkõõzz. Kääzzkõõzzâst äʹššneǩ vuäǯǯ õõutin puålu teäʹddlummšin koovv- da jiõnnõhttvuõđ Kela äʹššneǩ-kääzzkõʹsttja håʹt mâka jiijjâs dommsååʹff âʹlnn išttâd ååreeʹl. Ougglõskääzzkõõzzâst vuäitt hoiʹddjed pukid Kela-aaʹššid, mâʹte Kela kääzzkâʹsttempaaiʹǩin.
Ougglõskääzzkõõzzâst õnnum teknikk vueiʹtlvâstt vuässõõttjid teâttikkân juâkkmõõžž nuʹtt, što äʹššneǩ-kääzzkõʹstti vuäitt ouddmiârkkân tuärjjeed äʹššneeʹǩǩ lomaakk tieuʹddmest. Kääzzkõõzzâst lij še chat-jiõččvuõtt. Kääzzkõõzz âânnmõš ij määuʹs äʹššnekka ni mâid.
Jõs äʹššneeʹǩǩest ij leäkku vueiʹttemvuõtt väʹldded ougglõsõhttvuõđ dååma, õhttvuõđ Kelaaʹje vuäǯǯ hieʹlǩeld še Virtu-kääzzkâʹsttempaaiʹǩin (lääddas). Virtu-kääzzkâʹsttempäiʹǩǩ lij kåʹddneeʹǩǩ liâđǥlaž äʹššummuž päiʹǩǩ, koʹst kåʹddneǩ vuäitt ââʹnned koovvteʹlfonkääzzkõõzzid da jeeʹres Internet-kääzzkõõzzid di priʹnttjed, kopiâʹstted da skaʹnnʼjed.
Kela taʹrjjad ougglõskääzzkõõzz še tâʹvvsääʹmǩiõʹlle da nuõrttsääʹmǩiõʹlle arggpeeiʹvi čiâss 9–11.
5 fakta ougglõskääzzkõõzzâst
- Kela ougglõskääzzkõs lij jurddum jeäʹrben Lappi kooʹddi aassjid. Ougglõskääzzkõõzzâst vuäitt hoiʹddjed pukid Kela-aaʹššid. Ougglõskääzzkõõzzâst vuäǯǯ še digituärj jiõččtååimlaž neʹttäʹššummša.
- Kela ougglõskääzzkõs lij äävai aarǥi čiâss 9–15. Kääzzkõʹsse ij taarbâž ǩeeʹrjtõõttâd leʹbe vaʹrrjed ääiʹj, ij-ǥa tõt määuʹs äʹššnekka ni mâid.
- Kela ougglõskääzzkõõzz õhttvuõttväʹlddemliŋkk lij virtu.fi-portaalâst (lääddas).
- Õhttvuõtt ävvan automaattlânji Kela äʹššneǩ-kääzzkõʹsttja, kååʹtt vuäitt väʹldded äʹššneeʹǩǩ vuõssmõsân vuâstta. Vaʹrrjõõđ tõõzz, što õhttvuõđ vuäǯǯmõš vuäitt peʹštted vuäʹnkõs poodd. Taarbšak kääzzkõõzz ââʹnnma
- tableeʹtt, jeäʹrmmteʹlfoon leʹbe teâttmašina, koʹst lij kamera
- Chrome-, Firefox- leʹbe Safari-plaađânj
- nokk šiõǥǥ neʹttõhttvuõđ
- kulstõõǥǥid, koin lij mikrofon (leʹbe mikrofoon ja šäiggnid).
- Jõs õhttvuõttvälddmõš ij oʹnnest dååma, Kela ougglõskääzzkõʹsse vuäǯǯ õhttvuõđ še Virtu-kääzzkâʹsttempaaiʹǩin (lääddas), kook lie pirr Lappi-vuuʹd.
