Dárkkis, gusketgo Kela ovdonuppástusat du
- Allaskuvlastuđeanttaid ođđa dearvvasvuođadikšunmáksu. Allaskuvlastuđeanttat mákset dearvvasvuođadikšunmávssu Kelai vuosttas háve giđđalohkanbajis 2021. Dearvvasvuođadikšunmávssu mearri lea 35,80 euro lohkanbajis jagi 2021. Stuđentii ii sáddejuvvo rehket, muhto stuđeanta ferte máksit mávssu iešráđálaččat Kela áššiiddikšunbálvalusa bokte. Loga lasi dearvvasvuođadikšunmávssu birra.
- Allaskuvlastuđeanttaid borramušdoarjja badjána 0,36 euro. Doarjja lea 2,30 euro mállásis. Stuđeanttaid doarjagiidda bohtet nuppástusat maiddái korona dihtii. Áigemeari, mii vuoigadahttá ovdamearkan oahppoloatnabuhttemii dahje oahppoloatnageahpádussii, sáhttá guhkidit 0,5 lohkanjagiin, juos gárváneapmi čakčat ádjána koronaepidemiija dihtii. Maiddái skuvlamátkedoarjaga eavttut rivdet gaskaboddosaččat. Loga lasi stuđeanttaid ovdduid birra.
- Bargguhis olbmot. Oassi bargguhisvuođadorvui dahkkon koronaspiehkastemiin joatkašuvvá 31.3.2021 rádjai. Ovdamearkan bargguhisvuođaovddu suodjeoassi lea bajiduvvon 500 euroi ja johtalandoarjaga eavttut leat álkidahtton.
Lassin fitnodatolbmot sáhttet oažžut njukčamánu loahpa rádjai bargomárkandoarjaga, juos fitnodatdoaibma lea gillán koronaepidemiija dihtii. Vuođđobeaiveruđa ja bargomárkandoarjaga mearit bajiduvvojit 12 snt/bv. Ođđa mearri lea 33,78 e/bv. Loga lasi bargguhis olbmuid ovdduid birra. - Guhkesáigge buohccit. Dálkkasgoluid jahkeiežasvástu (ng. dálkkasgáhttu) badjána 2,12 euro. Jagi 2021 dat lea 579,78 e/kaleandarjahki. Buohcanbeaiveruđa sihke veajuiduhttin- ja sierradikšunruđa uhcimus mearit bajiduvvojit 11 snt/bv. Bargováiban- dahje oađđinapneabuohcciide lágiduvvo ođđalágan veajuiduhttin. Maiddái nuoraide, geain lea gávnnahuvvon Asperger, ADHD dahje ADD, lea fállun ođđa veajuiduhttinbálvalus. Loga lasi buohcanáigge ja veajuiduhttima doarjagiid birra.
- Ealáhatolbmot. Álbmotealáhahkii ja dáhkádusealáhahkii boahtá 0,4 %:a indeaksabajideapmi. Dievas álbmotealáhat okto ássái lea 1.1.2021 rájes 665,29 e/mb ja dáhkádusealáhat 837,59 e/mb. Kela dárkkista ealáhagaid euromeari almmá sierra ohcamuša haga. Loga lasi ealáhatolbmuid ovdduid birra.
- Mánáidruđat ja daidda laktáseaddji oktofuolaheaddjibajideapmi seilot ovddežin. Etniid-, áhčiid- ja vánhemiidbeaiveruđa sihke sierraetniidruđa uhcimus mearri badjána vehá. Ođđa mearri lea 29,05 e/bv. Loga lasi mánnábearrašiid ovdduid birra.
- Ovdo- ja ealáhatdieđut boahtoregistarii. Jagi 2021 álggu rájes Kela almmuha boahtoregistarii dieđuid máksojuvvon ovdduin ja ealáhagain. Boađuoažžu sáhttá dárkkistit boahtoregistara elektrovnnalaš áššiiddikšunbálvalusas reálaáigásaš dieđuid guoskkadin iežas bálká-, ealáhat- ja ovdoboađuid. Loga lasi boahtoregistara birra (suomagillii).
