Kieliversiot 2 min

Gáiddusbálvaleapmi ruoktot soffá ala Lappis

Kela geahččala ođđalágan gáiddusbálvaleami Lappis, gos leat guhkes mátkkit. Gáiddusbálvaleamis áššehas oažžu govvatelefonoktavuođa Kela áššehasbálvaleaddjái juogo dihtora dahje mobiilarusttega bokte dorvvolaččat ja álkit ruovttustis.

""

Kela álgá fállat Lappi gielddaid ássiide ođđalágan gáiddusbálvaleami. Bálvaleamis áššehas oažžu ovttain boalu deaddilemiin govva- ja jietnaoktavuođa Kela áššehasbálvaleaddjái vaikke iežas ruoktosoffá alde. Gáiddusbálvaleamis sáhttá dikšut buot Kela-áššiid, nugo Kela bálvalanbáikkiinge.

Gáiddusbálvaleamis geavahuvvon teknihkka dahká vejolažžan oassálastiide šearpma juohkima, nu ahte áššehasbálvaleaddji sáhttá ovdamearkan veahkehit áššehasa skovi deavdimis. Bálvaleamis lea maiddái chat-iešvuohta. Bálvaleami  geavaheapmi ii mávsse áššehassii maidige.

Juos áššehasas ii leat vejolašvuohta váldit gáiddusoktavuođa ruovttustis, oktavuođa oažžu Kelai álkit maiddái Virtu-bálvalanbáikkiin (suomagillii). Virtu-bálvalanbáiki lea gieldalačča elektrovnnalaš áššedikšuma báiki, gos gieldalaš sáhttá geavahit govvatelefonbálvalusaid ja eará Internet-bálvalusaid, sihke printet, kopieret ja skánnet.

Kela fállá gáiddusbálvaleami maiddái davvisámegillii árggaid dmu 13-15. Loga lasi sámegielat gáiddusbálvaleamis.

5 fákta gáiddusbálvaleamis

  1. Kela gáiddusbálvaleapmi lea dárkkuhuvvon erenomážit Lappi gielddaid ássiide. Gáiddusbálvaleamis sáhttá dikšut buot Kela-áššiid. Gáiddusbálvaleamis oažžu maiddái digidoarjaga iešráđálaš áššiiddikšumii neahta bokte.
  2. Kela gáiddusbálvaleapmi lea rabas árggaid dmu 9-15. Bálvaleapmái ii dárbbaš čálihit iežas dahje várret áiggi, iige dat mávsse áššehassii maidige.
  3. Kela gáiddusbálvaleami oktavuođaváldinliŋka lea virtu.fi-portálas (suomagillii).
  4. Oktavuohta rahpasa automáhtalaččat Kela áššehasbálvaleaddjái, gii luovvana vuosttasin. Ráhkkan dasa, ahte oktavuođa oažžun sáhttá bistit muhtin áigge. Dárbbašat bálvaleami geavaheapmái
    • tableahta, fiehttotelefona dahje dihtora, mas lea kamera
    • Chrome-, Firefox- dahje Safari-bláđejeaddji
    • doarvái buorre neahttaoktavuođa
    • belljosiid, main lea mikrofovdna (dahje mikrofovdna ja skájanat).
  5. Juos oktavuođaváldin ii lihkosmuva ruovttustat, Kela gáiddusbálvaleapmái oažžu oktavuođa maiddái Virtu-bálvalanbáikkiin (suomagillii), mat leat sierra guovlluin Lappis.